ბროწეული

ბათუმში, დავით კლდიაშვილის #2 ის ადგილია, რომელსაც ზღვისპირეთში ჩამოსვლისას აუცილებლად უნდა ესტუმროთ. ბროწეული / Brotseuli კერძო სახლის ეზოში მოწყობილი პატარა კაფეა, სადაც სამზარეულო მათი კულტურის მნიშვნელოვანი ნაწილია და ტრადიციული გემოების შეგრძნობა განსაკუთრებულად ლამაზ გარემოში შეგიძლიათ.

ბროწეულის ისტორია ძალიან ადრე დაიწყო, ჯერ კიდევ მაშინ, როდესაც ეს ეზო მხოლოდ მეგობრების შეკრების საყვარელი ადგილი და “ბირჟა” იყო. სახლი, სადაც რამდენიმე თვის წინ ეს პატარა კაფე გაჩნდა მაიკო ანანიძის ოჯახისაა და ბროწეულსაც ისინი უძღვებიან. სამზარეულოში თავიდან მხოლოდ დედა ტრიალებდა, ახლა კი უკვე ხუთი მზარეული ყავთ. ეზოც საკუთარი დიზაინით და გემოვნებით მოაწყვეს და მეგობრების შეკრების ადგილი ბიზნესად გადაიქცა. როგორც მაიკო ამბობს, კაფე მთელი ოჯახის ერთად შრომის შედეგია და თითოეულ წევრს თავისი წვლილი აქვს შეტანილი. სწორედ ამიტომაც არის განსაკუთრებულად თბილი და კარგი გარემო.

მენიუ ბროწეულში არასოდეს არის ზუსტად ერთნაირი, რადგან ინსპირაცია ხშირად პროდუქტების არჩევისას მოდის.

ფურცელზე ახალი კერძები ჩნდება იმის მიხედვით, თუ რა სეზონია, რომელი ბოსტნეული, ხორცი თუ ხილი არის განსაკუთრებით კარგი. ასე აიხსნება ხელით დაწერილი მენიუც, რომელიც თითქმის ყოველ კვირა ცოტათი იცვლება.

ბროწეულში მისულებს აუცილებლად დაგხვდებათ მათი განსაკუთრებული კერძები, მაგრამ ამავდროულად მუდამ შეგიძლიათ სიახლეებს ელოდო. და კიდევ ერთი, ყველა კერძს მითითებული აქვს ზუსტად რამდენ წუთში იქნება მზად და შეკვეთაც შეგიძლიათ ამის მიხედვით გააკეთოთ.

ბროწეულის მასპინძლები გაჩერებას ჯერ ნამდვილად არ აპირებენ. Მალე სივრცეს ვერანდაც დაემატება, სადაც კიდევ უფრო მეტი სტუმრის მიღება იქნება შესაძლებელი და რა თქმა უნდა, გამორჩეული იქნება საინტერესო ინტერიერითა და უგემრიელესი კერძებით. თუმცა, სანამ ახალი სივრცე გაიხსნება, აუცილებლად მოინახულეთ ეს ულამაზესი ადგილი, ადევნეთ თვალი ბროწეულის სოციალურ მედიას და შეიძლება გრილის, თევზის, ქათმის ან სულაც ხინკლის დღეებზე აღმოჩნდეთ!